चंद्रपूर जिल्ह्यात आज दुपारनंतर अचानक वातावरणात बदल होत वादळाने आणि पावसाने हजेरी लावली. नागभीड आणि मूल तालुक्यांत वादळी वाऱ्यांसह जोरदार पाऊस झाला असून, काही भागांत गारपीटही झाली आहे.

नागभीड शहरात वादळामुळे मोठ्या प्रमाणात धूळ उडाली. त्यानंतर आलेल्या पावसाने शहरासह परिसर झोडपून काढला. तालुक्यातील काही भागांत गारांचा मारा झाल्याचीही माहिती आहे.

सध्या शेतकऱ्यांकडील भाताचे उन्हाळी पीक कापणीच्या तयारीत असताना हा अचानक आलेला पाऊस आणि गारपीट यामुळे पिकाचे नुकसान होण्याची शक्यता आहे. या नैसर्गिक आपत्तीमुळे शेतकरी चिंतेत असून प्रशासनाकडून पंचनाम्याची मागणी होत आहे.