बीडमधील मस्साजोगचे सरपंच संतोष देशमुख यांच्या हत्येचे फोटो समोर आल्यानंतर महाराष्ट्र हादरून गेला. हेच फोटो बघून भावनाविवश झालेल्या केजमधील तरुणानं आयुष्य संपवलं.

बीड जिल्ह्यातील मस्साजोग येथील सरपंच संतोष देशमुख यांच्या हत्येच्या घटनेचे फोटो सोशल मीडियावर व्हायरल झाले होते. ते बघून अख्खा महाराष्ट्र हादरला होता. मन सुन्न करून टाकणारे ते फोटो होते. राज्यभरात संतापाची लाट उसळली होती. काळजावर घाव घालणारे फोटो बघून तरुणांपासून ते राजकारण्यांपर्यंत सगळेच हादरून गेले होते. दुसरीकडे, देशमुखांच्या हत्येचे फोटो बघून धीर गमावलेल्या एका २३ वर्षीय तरुणानं आत्महत्या केली. तो व्यथित झाल्याचे सांगण्यात येत होते. अशोक शिंदे असं या तरुणाचं नाव होतं. तो जानेगावचा रहिवासी होता. या घटनेची माहिती मिळताच, संतोष देशमुख यांचे बंधू धनंजय देशमुख हे तरुणाच्या कुटुंबीयांची भेट घेणार आहेत. कुणीही अशा प्रकारे टोकाचे पाऊल उचलू नये, असं आवाहन त्यांनी केले.