Pune Accident : पुण्यात पुन्हा भीषण अपघात; महामार्गावर ४ वाहनांची एकमेकांना धडक

पुण्यातील नवले पुलावर अपघातांची मालिका सुरूच आहे. आता पुणे-नाशिक महामार्गावरही भीषण अपघाताची घटना घडली आहे. या अपघातात चार वाहनांनी एकमेकांना धडक दिली आहे. पुण्यातील मंचर भागात झालेल्या अपघातात काही जण जखमी झाले. अपघातानंतर अनेकांची धावाधाव झाली.

नवले पुलावर भीषण अपघाताची घटना ताजी असताना पुणे-नाशिक महामार्गावरील पेठ बायपासवर अपघात झालाय. या महामार्गावर चार वाहनांचा विचित्र अपघाताची घटना घडली. ट्रकचा ब्रेक फेल तर छोटा टेम्पोचा टायर फुटल्याने दोन कारला धडक दिल्याने अपघात घडला. या अपघातात ४ जण जखमी झाल्याची माहिती मिळत आहे. अपघातानंतर रस्त्यावर उपस्थितांची धावाधाव झाली.

महामार्गावरील विचित्र अपघातानंतर बघ्यांची एकच गर्दी झाली. तर रस्त्याच्या दोन्ही बाजूला वाहतूककोंडी झाली. या अपघाताने महामार्गावरील वाहतूक ठप्प झाली. या अपघाताची माहिती मिळताच पोलिसांनी घटनास्थळी धाव घेतली. पोलिसांनी जखमींना तातडीने रुग्णालयात दाखल केलं. त्यानंतर महामार्गावर वाहतुकीत अडकलेल्या वाहनधारकांची कोंडीतून सुटका केली.

साताऱ्यात भीषण अपघात

साताऱ्यातील कराड -विटा मार्गावर चारचाकी कारचा आणि टेम्पोचा भीषण अपघात झाला. या अपघातात कारचा चक्काचूर झाला. अपघातात दोन युवक जागीच ठार तर दोघे गंभीर जखमी झाले. ओमकार थोरात आणि गणेश थोरात या दोघांचा अपघातात मृत्यू झाला. दोघेही मयत युवक कराड तालुक्यातील ओंड गावचे होते. तर या अपघातात ऋषिकेश थोरात आणि रोहन पवार गंभीर जखमी झाले. या प्रकरणी मयत चालक ओमकार थोरात यांच्या विरुद्ध कराड शहर पोलीस ठाण्यात गुन्हा दाखल करण्यात आला आहे.