सोलापूर येथील रमाबाई आंबेडकर नगर, न्यू बुधवार पेठ परिसरात आज सकाळी एक धक्कादायक घटना उघडकीस आली आहे. यशोदा सुहास सिद्धगणेश (वय ३५) या महिलेचा खून तिच्या पतीने केल्याची प्राथमिक माहिती समोर आली आहे. आज सकाळच्या सुमारास यशोदा या गंभीर जखमी आणि बेशुद्ध अवस्थेत आढळून आल्या. त्यांना तातडीने सोलापूर येथील शासकीय रुग्णालयात (सिव्हिल हॉस्पिटल) दाखल करण्यात आले.

मात्र, डॉक्टरांनी त्यांना मृत घोषित केले. घटनेची माहिती मिळताच स्थानिक पोलिस आणि फॉरेन्सिक टीम घटनास्थळी धाव घेतली असून, सध्या या प्रकरणाचा तपास सुरू आहे. या घटनेने परिसरात एकच खळबळ उडाली असून, यशोदा यांच्या नातेवाइकांनी रुग्णालयात मोठी गर्दी करून आक्रोश केला. यशोदा आणि सुहास या दांपत्याला दोन मुली आणि एक मुलगा असून, कौटुंबिक वादातून ही घटना घडल्याची शक्यता पोलिसांकडून वर्तवण्यात येत आहे. पुढील तपास पोलीस करीत आहेत.