राष्ट्रवादी काँग्रेसमधील विलिनीकरणाच्या चर्चेवरून राजकीय वातावरण तापलं असतानाच ठाकरे गटाचे खासदार संजय राऊत यांनी मोठं विधान केलंय. शरद पवार हे इंडिया आघाडीचे मोठे स्तंभ आहेत. अजित पवार गटाने शरद पवारांसोबत यायचं की नाही, याचा निर्णय पवारच घेतील. मात्र, शरद पवार भाजपसोबत सत्तेत जाणार नाहीत, असं स्पष्ट मत संजय राऊत यांनी व्यक्त केलंय. शरद पवार यांच्याबाबत सातत्याने वेगवेगळ्या बातम्या येत आहेत. पंतप्रधान मोदी फोन करून देश सांभाळण्याची भाषा करतात, मग आमचे पक्ष का फोडले, असा घणाघाती सवालही राऊत यांनी उपस्थित केला. शरद पवार यांची प्रकृती आणि उपचार सुरू असल्याने त्यांच्याशी सध्या फार चर्चा करण्याची परिस्थिती नसल्याचंही त्यांनी स्पष्ट केलं.