देशात गॅसचे दर सातत्याने वाढत आहेत. आजही गॅसची दरवाढ झाली असून, सरकारचे महागाई नियंत्रण म्हणजे जनतेला टप्प्याटप्प्याने झटके देणे असेच आहे," असा टोला राष्ट्रवादी काँग्रेसचे अध्यक्ष आणि खासदार शरद पवार यांनी सरकारला लगावला आहे. एका खाजगी कार्यक्रमासाठी कोल्हापूरला आलेले पवार आज प्रसारमाध्यमांशी संवाद साधत होते, त्यावेळी ते बोलत होते.

गॅस दरवाढ आणि महागाईबद्दल विचारले असता खासदार शरद पवार म्हणाले, इंधन आणि गॅस यांच्या किमती टप्प्याटप्प्याने वाढत आहेत. पंतप्रधानांनी आम्ही महागाई नियंत्रणात ठेवल्याचे म्हटले होते; परंतु जनतेला टप्प्याटप्प्याने दरवाढीचे झटके देणे, हेच त्यांचे महागाई नियंत्रणाचे सूत्र असल्याचे दिसत आहे. गॅसच्या किमती वाढल्याने त्याचा थेट परिणाम सर्वसामान्यांच्या बजेटवर आणि प्रपंचावर होतो. याची किंमत सत्ताधाऱ्यांना योग्य वेळी कळेल.