साताऱ्यातील कराडमधून धक्कादायक प्रकार समोर आला आहे. कराडमधील दोन नामांकित डॉक्टर महिलांचे AIच्या माध्यमातून अश्लील व्हिडिओ बनवल्याचं समोर आलं आहे. याप्रकरणी कराड शहर पोलिस ठाण्यात गुन्ह्याची नोंद करण्यात आली आहे. या प्रकरणाचा सूत्रधार स्वतःला डॉक्टर म्हणून घेणाराच एक संशयित असल्याचे समोर आलं आहे. संशयावरून कराडमधीलच एका डॉक्टरसह दोघांना पोलिसांनी ताब्यात घेतलं आहे.

हे अश्लील व्हिडीओ कसे बनवण्यात आले आणि हे प्रकरण नेमकं काय आहे याची माहिती पोलिसांनी दिली. पोलिस अधिकाऱ्याने सांगितले की, 'नागेश शिंदे नावाच्या व्यक्तीने काही मोबाईल नंबर पाठवून दिले. त्याचा ग्रुप तयार करण्यास सांगितला. हा ग्रुप तयार झाल्यानंतर काही अश्लील व्हिडीओ तयार करून ते या ग्रुपवर टाकण्यास सांगितले. कराडमधील डॉक्टर महिला, सामाजिक कार्यकर्ता महिला आणि सामाजिक कार्यकर्ता पुरूष यांचे हे अश्लील व्हिडीओ तयार केले गेले. विकास शर्माने हे व्हिडीओ पोस्ट केले होते. नागेश शिंदेला आरोपी बनवण्यात आले असून या प्रकरणाचा तपास सुरू आहे.