राज्य सरकारने यंदाच्या गणेशोत्सावत डीजे, डॉल्बी वाजवण्यास बंदी घातली आहे. या पार्श्वभूमीवर शिंदे गटाचे मंत्री संजय शिरसाट यांनी छत्रपती संभाजीनगरमधील गणेश मंडळांना डीजेएवजी बँड, बँजो मागवा असे आवाहन केले. यावेळी संजय शिरसाट यांनी एक मिश्किल टिप्पणी केली आहे. तुम्ही बाहेरून बँड, बँजो मागवा, पैसे कमी पडले तर माझी बॅग उघडीच आहे असे संजय शिरसाट म्हणाले. काही दिवसांपूर्वीच संजय शिरसाट हे आपल्या बेडरूममध्ये बसले असतानाचा व्हिडिओ व्हायरल झाला होता. या व्हिडिओमध्ये त्यांच्या खोलीत पैशांच्या नोटांनी भरलेली बॅग दिसली होती. या व्हिडिओने मोठी खळबळ उडाली होती. या व्हिडिओच्या अनुषंगाने संजय शिरसाट यांनी संभाजीनगरमधील कार्यक्रमात हे भाष्य केले आणि त्यानंतर एकच हशा पिकला.