उद्योगपती रतन टाटा यांचे पार्थिव अंत्यसंस्कारासाठी वरळी येथील स्मशानभूमीत आणण्यात आल्यानंतर त्यांना अखेरचा निरोप देण्यासाठी केंद्रीय गृहमंत्री अमित शहा, केंद्रीय मंत्री पियुष गोयल, महाराष्ट्राचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस उपस्थित होते. यावेळी मुंबई पोलिसांकडून त्यांना मानवंदना देण्यात आली.

बुधवारी रात्री अकराच्या सुमारास टाटा सन्सचे अध्यक्ष रतन नवल टाटा यांचं वयाच्या 86 व्या वर्षी निधन झालं. त्यांच्या पार्थिवावर गुरुवारी 5.30 वाजता शासकीय इतमामात अंत्यविधी करण्यात आला. त्यापूर्वी त्यांचं पार्थिव दर्शनासाठी दिवसभर एनसीपीएमध्ये ठेवण्यात आलं होतं. यावेळी अनेक दिग्गज नेते, कलाकार, उद्योजकांनी याठिकाणी भेट देऊन त्यांना श्रद्धांजली अर्पण केली. रतन टाटा यांच्या निधनामुळे संपूर्ण देश हळहळला आहे. महाराष्ट्र आणि झारखंडमध्ये एका दिवसाचा राजकीय दुखवटा जाहीर करण्यात आला आहे. टाटा हे पारशी असल्याने त्यांच्यावर पारसी पद्धतीने अंत्यसंस्कार करण्यात आले. मुंबईतील ब्रीच कँडी हॉस्पिटलच्या अतिदक्षता विभागात (आयसीयू) रतन टाटा यांना प्रकृती खालवल्याने बुधवारी दाखल करण्यात आले होते. बुधवारी रात्री अकराच्या सुमारास त्यांनी अखेरचा श्वास घेतला.