मोहोळचे माजी आमदार राजन पाटील यांनी त्यांचे पुत्र बाळराजे पाटील यांच्या वक्तव्याबद्दल माफी मागितली आहे. अनगर नगरपंचायत निवडणुकीत उज्ज्वला थेटे यांचा अर्ज बाद झाल्यानंतर बाळराजे यांनी उपमुख्यमंत्री अजित पवार यांना थेट आव्हान दिले होते. यावर बोलताना राजन पाटील यांनी आपण मुलाच्या विधानाचे समर्थन करत नसल्याचे स्पष्ट केले. पाटील म्हणाले, त्याचे मी समर्थन करत नाही. मी अजितदादांचे, मोठ्या साहेबांचं, पवार परिवारांचं त्या ठिकाणी दिलगीरी व्यक्त करतो, माफी मागतो आणि मोठ्या साहेबांच्या चरणी मी लीन होतो. त्यांनी म्हटले की, अनगरमध्ये निवडणुका सहसा बिनविरोध होतात. मात्र यावेळी निवडणूक लागल्याने मुले उत्साहाच्या भरात बोलली असतील. हा विषय इथेच संपवावा, अशी विनंतीही त्यांनी केली आहे.

माझ्या मुलाच्या तोंडून न कळत, भावनेत, उत्साहात जे अपशब्द गेलेत ते जायला नको होते. त्याबद्दल मी अजितदादा आणि पवार परिवाराचं अंतःकरणपूर्वक दिलगिरी व्यक्त करतो, क्षमा व्यक्त करतो, मोठ्या साहेबांच्या चरणी मी नतमस्तक होतो. माझी विनंती हा विषय आता थांबवावा. अजितदादांनी पार्थ किंवा जयसारखं समजून बाळराजे पाटलांना पदरात घ्यावं, अशी विनंती त्यांनी अजित पवारांना केली.