दारूच्या नशेत एका परप्रांतीय तरुणाने मनसे पक्षप्रमुख राज ठाकरे यांना शिवीगाळ केली होती. या घटनेचा व्हिडिओ व्हायरल झाल्यानंतर मनसे चांगलीच आक्रमक झाली आहे. मनसेच्या माथाडी कामगार सेनेकडून मुंबईतील अंधेरी पूर्वेकडील महाकाली रोडवरील सुंदरनगर परिसरात आंदोलन करण्यात आले. मनसे कार्यकर्त्यांनी शिवीगाळ करणाऱ्या परप्रांतीय नागरिक सुजित दुबे यांच्या अनधिकृत वॉशिंग सेंटरवर तोडफोड केली. मनसे कार्यकर्त्यांनी सांगितले की, तो मराठ्याला चॅलेंज करतोय. मराठी माणसाला आव्हान देतोय. तसेच, त्यांनी आरोप केला की वॉशिंग सेंटर अनधिकृत असून तिथे ड्रग्स सप्लायसारख्या इतर अनेक गैरकायदेशीर धंदे चालत आहेत.

मनसैनिकांनी नमूद केले की, सुजित दुबे आणि शिवम बाल यांनी राज ठाकरे यांना शिवीगाळ केली होती. पोलिसांनी सुजित दुबेच्या वडिलांना अटक केली असून, सुजित दुबे रात्रीपासून फरार आहे. मनसैनिकांनी इशारा दिला आहे की, जोपर्यंत सुजित दुबे सापडत नाही, तोपर्यंत असे प्रकार सुरू राहतील आणि मराठी माणसाला आव्हान देणाऱ्यांवर योग्य ती कारवाई केली जाईल.