पुणे येथील हिंजवडी फेज एकमधील एका नामांकित इंटरनॅशनल स्कूलला बॉम्बने उडवून देण्याची धमकी मिळाल्याने खळबळ उडाली आहे. शाळेच्या अधिकृत ईमेलवर हा धमकीचा संदेश आल्यानंतर प्रशासनाने तात्काळ पिंपरी-चिंचवड पोलिसांना माहिती दिली. या घटनेचे गांभीर्य ओळखून पोलिसांनी तातडीने तपास सुरू केला असून, खबरदारीचा उपाय म्हणून शाळा रिकामी करण्यात आली आहे. घटनास्थळी बॉम्ब शोधक व नाशक पथक आणि श्वान पथक दाखल झाले असून शाळेच्या आवारात कसून तपासणी सुरू आहे.