भाजपने मुंबई उत्तर मध्य मतदारसंघातून ज्येष्ठ वकील उज्ज्वल निकम यांना उमेदवारी दिली आहे. लोकसभा निवडणुकीत याच मतदारसंघातून काँग्रेसने वर्षा गायकवाड यांना मैदानात उतरवलं आहे. आता निकम विरुद्ध गायकवाड असा थेट सामना मुंबई उत्तर मध्य मतदारसंघात होणार आहे. निकम यांना उमेदवारी दिल्यानंतर प्रवीण दरेकर यांनी एक्स्क्लुझिव्ह प्रतिक्रिया दिली आहे.

मी उमेदवारीचं स्वागत करतो. भाजपचं मनापासून अभिनंदन करतो. निकम यांनी २६-११ हल्ल्याच्या खटल्यात काय भूमिका निभावली आहे हे अवघ्या देशानं पाहिलंय. अशा प्रकारचं एक निष्णात वरिष्ठ वकील उज्ज्वल निकम यांना उमेदवारी दिलीय. त्यांचं स्वागत आहे. एक चांगला संदेश यातून सर्वसामान्यांमध्ये आणि समाजमनात जाईल असा मला पूर्ण विश्वास आहे, अशी प्रतिक्रिया भाजप नेते प्रवीण दरेकर यांनी दिली. काँग्रेसकडून उमेदवार असलेल्या वर्षा गायकवाड यांचं आव्हान असेल का याबाबत विचारलं असता, अजिबात आव्हान नसेल, असंही दरेकर म्हणाले.