पंढरपूरच्या श्री विठ्ठल-रुक्मिणी मंदिरात तब्बल ७६ दिवस चाललेल्या चंदनउटी पूजेची मोठ्या भक्तीभावाने सांगता करण्यात आली. दरवर्षी गुढीपाडव्यापासून मृग नक्षत्रापर्यंत ही परंपरा जपली जाते. वाढत्या उन्हापासून श्रीविठुरायाला शीतलता मिळावी, यासाठी दररोज दुपारी चंद्रवटी पूजा होते. यंदा चंदनउटी पूजेसाठी तब्बल ९५ किलो चंदनाचा वापर करण्यात आला आहे. चंदनउटी पूजेच्या माध्यमांतून मंदिर समितीला सुमारे 35 लाख 13 हजार रूपयांचे उत्पन्न मिळाले आहे. देशभरातून आलेल्या भाविकांनी या पूजेमध्ये सहभाग घेतला. चंदनाचा सुगंध आणि विठ्ठल नामाच्या गजरात संपूर्ण मंदिर परिसर भक्तिमय वातावरणाने न्हाउन निघाला होता. ही पारंपरिक पूजा श्रद्धा, सेवा आणि सातत्याचा अद्वितीय संगम मानली जाते.

विठ्ठल आणि श्री रूक्मिणीमातेची चंदनउटी पुजा सदस्या ॲड माधवी निगडे व कार्यकारी अधिकारी राजेंद्र शेळके, सदस्य ज्ञानेश्वर देशमुख (जळगांवकर) आणि व्यवस्थापक मनोज श्रोत्री यांच्या शुभहस्ते संपन्न झाली.