महाराष्ट्राच्या पोलीस महासंचालक (DGP) पदासाठी एनआयएचे प्रमुख सदानंद दाते यांचे नाव सर्वाधिक चर्चेत आहे. सदानंद दाते यांची पुढील DGP म्हणून नियुक्ती होण्याची दाट शक्यता व्यक्त केली जात आहे.सूत्रांच्या माहितीनुसार, दाते यांना एनआयए मधून कार्यमुक्त करण्यासाठी राज्य सरकारने केंद्र सरकारकडे औपचारिक प्रस्ताव पाठवला आहे. सध्या कार्यरत DGP रश्मी शुक्ला या वर्षाअखेरीस सेवानिवृत्त होत असल्याने नव्या DGP निवडीची प्रक्रिया सुरू आहे.

अलीकडेच राज्याच्या गृह विभागाने केंद्रीय लोकसेवा आयोगाकडे पाठवलेल्या सात वरिष्ठ अधिकाऱ्यांच्या यादीत सदानंद दाते यांचे नाव समाविष्ट असल्याचीही माहिती समोर आली आहे. त्यामुळे त्यांच्या नियुक्तीची शक्यता आणखी बळावली आहे.

1990 च्या तुकडीचे अधिकारी असलेल्या सदानंद दाते यांचे नाव पहिल्या क्रमांकावर आहे. 26/11 हल्ल्यात अतिरेक्यांशी प्रत्यक्ष दोन हात करणारे आणि सध्या ते एनआयएचे प्रमुख म्हणून जबाबदारी संभाळत आहे.