नवी मुंबईत अखेर पावसाने दमदार हजेरी लावली असून, वाशी, बेलापूर, खारघर आणि उरण परिसरात मुसळधार पावसाला सुरुवात झाली आहे. सकाळपासून वातावरण ढगाळ होतं, आणि आता जोरदार पावसाने शहरात एन्ट्री घेतली आहे.पावसाची तीव्रता लक्षात घेऊन नवी मुंबई महानगरपालिकेचा आपत्ती व्यवस्थापन विभाग पूर्णतः सज्ज झाला आहे. जलमय होऊ शकणाऱ्या भागांमध्ये विशेष पथक तैनात करण्यात आलं असून, ड्रेनेज यंत्रणा, पाणी उपसणाऱ्या पंपांची चाचणी आणि नियंत्रण कक्ष २४ तास कार्यरत ठेवण्यात आला आहे.

नागरिकांना सुरक्षित राहण्याचे, नाल्यांच्या आसपास न जाण्याचे आणि अनावश्यक प्रवास टाळण्याचे आवाहन महापालिकेकडून करण्यात आले आहे. हवामान विभागाच्या अंदाजानुसार, पुढील काही तास नवी मुंबईत अतिवृष्टीची शक्यता आहे. त्यामुळे नागरिकांनी सतर्क राहून अधिकृत सूचनांचं पालन करण्याचं आवाहन करण्यात येत आहे.