नवी मुंबईतील बेलापूर येथील न्यायालयात एक विचित्र आणि अंधश्रद्धेला खतपाणी घालणारा प्रकार समोर आला आहे. कोर्टाच्या परिसरात एका लिंबाला हळद-कुंकू लावून त्यावर एक कागद रोवण्यात आल्याचा व्हिडीओ सध्या सोशल मीडियावर प्रचंड व्हायरल होत आहे.

हा प्रकार न्यायाच्या मंदिरात घडल्याने अनेकांनी आश्चर्य व्यक्त केले आहे. संबंधित व्हिडीओमध्ये कोर्टाच्या आवारात लिंबू ठेवलेला असून त्यावर काहीतरी लिहिलेला कागद टोचलेला दिसतो. हळद-कुंकू लावल्यामुळे या घटनेला अंधश्रद्धेची किनार असल्याचा संशय व्यक्त करण्यात येतो आहे.

या घटनेनंतर आता कोर्ट प्रशासन या प्रकरणाची दखल घेणार का? याची माहिती घेणार का? आणि या प्रकरणाचा तपास करणार का? याकडे सर्वांचे लक्ष लागले आहे. या प्रकारामुळे पुन्हा एकदा अंधश्रद्धेच्या कृती न्यायव्यवस्थेच्या ठिकाणी होत असल्याने चिंता व्यक्त होत आहे. कायद्याच्या ठिकाणीच अशा गोष्टी घडणं दुर्दैवी असल्याचं नागरिकांकडून म्हटलं जात आहे.