नाशिक: येथील गोदावरी नदीकाठी असलेल्या ऐतिहासिक रामकुंडावर सोमवारी सायंकाळी छटपूजेदरम्यान दोन गटांमध्ये हाणामारी झाल्याची घटना घडली. या घटनेमुळे काही वेळ रामकुंड परिसरात गोंधळाचे वातावरण निर्माण झाले होते.

छटपूजेसाठी उत्तर भारतीय नागरिक मोठ्या संख्येने रामकुंडावर जमा झाले होते. पारंपरिक पद्धतीने गंगा स्नान, सूर्य प्रार्थना आणि व्रताच्या विधी सुरू असतानाच दोन गटांमध्ये किरकोळ वाद झाला. काही वेळातच तो वाद वाढला आणि फ्री स्टाईल हाणामारी सुरू झाली. घटनेची माहिती मिळताच पोलिसांनी तातडीने घटनास्थळी धाव घेतली आणि दोन्ही गटांना ताब्यात घेत परिस्थिती नियंत्रणात आणली. सुदैवाने या घटनेत कोणतीही गंभीर जखमी झाल्याची माहिती नाही. हाणामारीचे नेमके कारण अद्याप स्पष्ट झालेले नसून पोलीस या प्रकरणाचा पुढील तपास करत आहेत. दरम्यान, छटपूजेसाठी नाशिकच्या रामकुंडावर उत्तर भारतीय भाविकांची मोठी गर्दी झाली होती. वातावरण भक्तिभावाने भरलेले असले तरी या घटनेने काही काळ तणावाचे सावट निर्माण झाले.