नाशिकमधील सदनिका घोटाळा प्रकरणी नाशिकच्या जिल्हा सत्र न्यायालयाने क्रीडा आणि अल्पसंख्याक विकास मंत्री माणिकराव कोकाटे यांना दोषी ठरवून दोन वर्षांची शिक्षा सुनावली आणि त्यांचा अटक वाँरंट देखील जारी करण्यात आला आहे. मात्र त्यांच्या वकिलाच्या वतीने न्यायालयाला कोकाटे यांची प्रकृती बिघडलेली असून त्यांना रुग्णालयात दाखल करण्यात आले. मात्र न्यायालयाने त्यांना फटकारत रुग्णालयात भरती झाल्याबाबतचे अधिकृत लेखी पुरावे सादर करावे असे सांगितले. माणिकराव कोकाटे यांच्याविरोधात न्यायालयाने दिलेल्या नॉन-बेलेबल अटक वॉरंटची अंमलबजावणी करण्यासाठी नाशिक पोलिसांची विशेष टीम थोड्याच वेळात मुंबईकडे रवाना होणार आहे.

सूत्रांनी दिलेल्या माहितीनुसार सध्या कोकाटे हे मुंबईतील लीलावती हॉस्पिटलमध्ये उपचार घेत असल्याची माहिती असून तेथे जाऊन अटक वॉरंट बजावण्याची तयारी पोलिसांनी केली आहे. न्यायालयाच्या आदेशानुसार कारवाई करत नाशिक पोलिस लीलावती हॉस्पिटलमध्ये जाऊन माणिकराव कोकाटे यांना अटक वॉरंट बजावणार आहेत. या कारवाईमुळे राजकीय वर्तुळात खळबळ उडाली आहे.