मुंबईतील आझाद मैदानावर मराठा समाजाचं आंदोलन सुरू असून मनोज जरांगे पाटील उपोषणाला बसले आहेत. या आंदोलनाला राज्यभरातून मोठ्या प्रमाणावर पाठिंबा मिळत आहे. काल लासलगाव येथून कार्यकर्ते आंदोलनस्थळी रवाना झाले. यासाठी खास भाकऱ्या आणि पोळ्या तयार करून नेण्यात आल्या. या भाकऱ्या तयार करण्यासाठी लासलगावमधील मुस्लिम महिलांनी पुढाकार घेतला. जवळपास २० मुस्लिम महिलांनी तब्बल २,५०० भाकऱ्या बनवून कार्यकर्त्यांकडे सुपूर्द केल्या. या माध्यमातून सामाजिक ऐक्य आणि बंधुभावाचं दर्शन घडल्याचं स्थानिकांकडून सांगितलं जात आहे. मराठा समाजाच्या लढ्यात मुस्लिम बांधवांचाही सहभाग दिसून आल्याने आंदोलनाला एक वेगळाच संदेश मिळाल्याचं मानलं जात आहे.