बीड: मंत्री पंकजा मुंडे यांना जय महाराष्ट्र करत माजलगाव मतदारसंघातील मुंडे पिता-पुत्रांचा आज राष्ट्रवादी अजित पवार गटात पक्षप्रवेश होत आहे. उपमुख्यमंत्री अजित पवार यांच्या प्रमुख उपस्थितीत संध्याकाळी साडे पाच वाजता वडवणी शहरात मुंडे पिता-पुत्र घडयाळ हाती घेणार आहेत. मागील 35 वर्षांपासून दिवंगत गोपीनाथ मुंडे आणि पंकजा मुंडे यांच्यासोबत एकनिष्ठ राहिलेले राजाभाऊ मुंडे आणि बाबरी मुंडे या दोघा पिता-पुत्रांचा राष्ट्रवादी अजित पवार गटात प्रवेश होणार आहे. माजलगाव मतदारसंघाचे आमदार प्रकाश सोळंके याच्या नेतृत्वात हा पक्षप्रवेश केला जात आहे.

दरम्यान धनंजय मुंडे यांना या पक्षप्रवेश सोहळ्यात कुठलेही आमंत्रण दिले नसून त्यांना डावलण्यात आले आहे. तर वडवणी येथे पक्षप्रवेशाच्या बॅनरवरून धनंजय मुंडे यांचा फोटो देखील लावला नाहीये. यामुळे मुंडे विरुद्ध मुंडे ह संघर्ष बीडच्या राजकारणात पुन्हा पाहायला मिळतं आहे.