मुंबईतील पवई या उच्चभ्रू परिसरात एका व्यक्तीने जवळपास २० ते २२ अल्पवयीन मुलांना ओलीस ठेवल्याने खळबळ उडाली. रोहित आर्य असं या माथेफिरूचे नाव आहे. तो पुण्याचा असल्याची माहिती समोर आली आहे. रोहितने प्लान करून या मुलांना ओलिस ठेवले. पवईतील स्टुडिओमध्ये या मुलांना ऑडिशनसाठी बोलावून आरोपीने त्यांना ओलिस ठेवले. आरोपीने एक व्हिडिओ सोशल मीडियावर शेअर केला. त्याने स्टुडिओ पेटवून देण्याची धमकी दिली. पोलिसांनी आणि अग्निशमन दलाने घटनास्थळी धाव घेत आरोपीला अटक करत मुलांची सुखरूप सुटका केली.

रोहित आर्यने पवईतील एका स्टुडिओमध्ये ऑडिशनसाठी आलेल्या १५ वर्षांखालील मुलांना ओलिस ठेवले. आपल्याला कोणतीही पैशांची मागणी नसून केवळ काही लोकांशी चर्चा करायची असल्याचे तो म्हणाला. त्याने व्हिडिओमध्ये सांगतिले की, 'मी रोहित आर्य. आत्महत्या करण्याचा मी प्लान केला होता, पण अचानक प्लान बदलला आणि मी २० मुलांना ओलिस ठेवले आहे. माझ्या काही मागण्या आहेत. मला काही लोकांशी बोलायचे आहे. माझे काही प्रश्न आहेत मला त्याची उत्तरं पाहिजेत. मी कुणी दहशतवादी नाही. पण माझ्या प्रश्नांची उत्तर पाहिजे.'