मुंबईत रविवारी मध्यरात्रीपासून मुसळधार पाऊस सुरू आहे. पावसामुळे रस्ते जलमय झाले असून सखल भागात पाणी शिरलं आहे. अंधेरी पूर्व पश्चिमेला जोडणारा अंधेरी सब-वे देखील पाण्याखाली गेला असून सध्या अंधेरी सबवे वाहतुकीसाठी बंद करण्यात आला आहे. सबवेवर ५ फुटापर्यंत पाणी साचल्याचे पाहायला मिळत आहे.

दुसरीकडे अंधेरी पूर्वेकडील अंधेरी सभेला जोडणारा जो मुख्य रस्ता आहे तो रस्ताच मुसळधार पावसात वाहून गेला आहे. विशेष बाब म्हणजे, हा रस्ता दोन महिन्यापूर्वी महापालिकेच्या माध्यमातून बनवण्यात आला होता. नागरिकांनी या रस्त्याच्या कामासंदर्भात आवाजही उठवला होता.

आज हा रस्ता पूर्णपणे पाण्याखाली वाहून गेल्याने रस्त्याच्या कामावर नागरिकांनी पुन्हा प्रश्नचिन्ह निर्माण केलं आहे. पावसामुळे मालाड भुयारी मार्ग बंद देखील वाहतुकीसाठी बंद करण्यात आला आहे. भुयारी मार्गाच्या आत एक कार अडकली आहे आणि पाण्यात तरंगताना दिसत आहे. गाडीतील प्रवाशांना सुखरूप बाहेर काढण्यात आले आहे.