मुंबईत बाईक टॅक्सीवर पुन्हा एकदा कारवाई करण्यात आली आहे. मुंबईत रॅपिडोसह ओलाविरोधात आणखी गुन्हा दाखल करण्यात आला आहे. आंबोली पोलिसांनी परवानगी नसताना सुद्धा बाईक टॅक्सी चालवल्याप्रकरणी ही कारवाई केली आहे. तर दुसरीकडे नाशिकमध्ये देखील बाइक टॅक्सीविरोधात कारवाई करण्यात आली आहे. प्रादेशिक परिवहन विभागाचा परवाना नसताना शहरात बाइक टॅक्सी सेवा पुरवणाऱ्या एका कंपनीविरोधात पंचवटी पोलिस ठाण्यात बेकायदेशीर प्रवासी वाहतूक करत शासनाची फसवणूक केल्याप्रकरणी गुन्हा दाखल करण्यात आला आहे.

विशेष म्हणजे १५ दिवसांपूर्वी शहरात ही सेवा सुरू झाली होती. मोटार वाहन निरीक्षक योगेश सपिके यांनी दिलेल्या तक्रारीत म्हटले की, अॅपद्वारे बेकायदेशीर प्रवासी वाहतूक करत शासनाची फसवणूक करत असल्याची माहिती मिळाली. त्यानुसार प्रवासी वाहतूक करण्यास प्रोत्साहन देत आर्थिक फायदा मिळवणाऱ्या ट्रान्सपोर्ट प्रा. लि. रॅपिडो कंपनीच्या संचालकांविरोधात तक्रार दिली आहे. संबंधित कंपनीने नाशिक आरटीओकडे परवानगी घेतली नसल्याने गुन्हा दाखल झाला आहे. पुढील तपास पंचवटी पोलिस ठाण्याअंतर्गत सुरू आहे.