मुंबईकरांना सध्या ऑक्टोबर हिटचा जबरदस्त तडाखा बसला असून तापमान तब्बल ३७ अंशावर गेले आहे. ऐन दिनाळीच्या दिवसांत उकाड्यामुळे नागरिक अक्षरश: घामाघुम झाले आहेत. हवामान विभागाच्या माहितीनुसार, भाऊबीजपर्यंत ही उष्णतेची लाट कायम राहण्याची शक्यता आहे. दिवाळीच्या पार्श्वभूमीवर फटाक्यांमुळे वाढणारे प्रदूषण उकाड्याची तीव्रता आणखी वाढवू शकते, असा अंदाज व्यक्त करण्यात आला आहे. सकाळपासूनच उकाड्याने त्रस्त झालेल्या मुंबईकरांना संध्याकाळपर्यंतही दिलासा मिळालेला नाही. दिवाळीच्या आनंदातही या वाढत्या उकाड्याने उत्साहाला घामाचा स्पर्श दिला आहे.