मुंबईतील गेट वे ऑफ इंडिया परिसरात आज सकाळपासून नागरिकांची मोठी गर्दी पाहायला मिळाली. समुद्राला आलेल्या भरतीमुळे उंचच उंच लाटा उसळताना दिसून आल्या, आणि या लाटांचं पाणी थेट रस्त्यापर्यंत पोहोचल्याने परिसरात थराराचे वातावरण निर्माण झाले.

भरतीच्या लाटांचा आनंद घेण्यासाठी आणि त्या थेट अंगावर झेलण्यासाठी अनेक मुंबईकरांनी गेट वे परिसरात गर्दी केली होती. सायंकाळच्या सुमारास लाटांची तीव्रता अधिक वाढल्याने दृश्य आणखीनच रोमांचक झाले. अनेकांनी मोबाईलमध्ये व्हिडिओ आणि फोटो टिपत हे क्षण कैद केले.

हवामान खात्याच्या माहितीनुसार, येत्या काही दिवसांत भरतीचा जोर कायम राहण्याची शक्यता असून नागरिकांनी समुद्र किनाऱ्यांपासून सावध राहण्याचे आवाहन करण्यात आले आहे.