मुंबई: आज मेट्रो ३ ने ऐतिहासिक टप्पा गाठला आहे. ॲक्वा लाईन’ म्हणून ओळखल्या जाणाऱ्या या भुयारी मेट्रोने कफ परेड या अंतिम स्थानकापर्यंत यशस्वी धाव पूर्ण केली आहे. त्यामुळे मुंबई मेट्रो रेल कॉर्पोरेशन (MMRC) साठी हा दिवस अत्यंत महत्त्वपूर्ण ठरला आहे. लवकरच मुंबईकरांच्या दैनंदिन प्रवासातील मोठी समस्या सुटण्याच्या मार्गावर आहे. आचार्य अत्रे ते कफ परेड हा मेट्रोमार्ग प्रवासी सेवेसाठी सुरू करण्याच्या दिशेने आता महत्त्वाचे पाऊल उचलण्यात आले आहे.

एकूण ३३.५ किमी लांबीच्या या मार्गातील पहिला टप्पा १२.६९ किमी आरे-जोगेश्वरी विक्रोळी लिंक रोड ते वांद्रे कुर्ला कॉम्प्लेक्स (BKC) ७ ऑक्टोबर २०२४ पासून प्रवाशांसाठी खुला करण्यात आला. त्यानंतर दुसरा टप्पा, ९.७७ किमी लांबीचा (धारावी ते आचार्य अत्रे चौक), वेगाने पूर्णत्वाच्या दिशेने वाटचाल करत आहे, आणि या मार्गावर नियमित चाचण्या सुरू आहेत. या टप्प्यामुळे सात महत्त्वाची स्थानके परस्पर जोडली जाणार आहेत.