मुंबई : मागील काही दिवसांपासून पावसाने दांडी मारली होती. मात्र गेल्या दोन दिवसांपासून संततधार स्वरूपात बरसत आहे. मध्यरात्रीपासूनच मुंबई आणि उपनगरांमध्ये मुसळधार पावसाने हजेरी लावली असून सकाळपासून पावसाचा जोर कायम आहे.

गेल्या काही दिवसांपासून मुंबईकरांना उन्हाच्या तडाख्याचा त्रास सहन करावा लागत होता. मात्र, आज सकाळी झालेल्या मुसळधार पावसामुळे अनेक ठिकाणी पाणी साचले आहे. विशेषतः दादर पश्चिम रेल्वेस्थानक पाण्याखाली गेले असून त्यामुळे प्रवाशांची मोठी तारांबळ उडाली आहे. सकाळी ऑफिस आणि कामानिमित्त बाहेर पडणाऱ्या नागरिकांना मोठ्या अडचणींचा सामना करावा लागत आहे.

भारतीय हवामान खात्याने मुंबईसह रायगड आणि कोकणात रेड अलर्ट जारी केला आहे. तर रत्नागिरीसाठी ऑरेंज अलर्ट जारी करण्यात आला आहे. पुढील काही तासांत मुसळधार ते अतिमुसळधार पावसाची शक्यता वर्तवण्यात आली आहे.