सातारा जिल्ह्यातील फलटणमध्ये एका महिला डॉक्टरच्या आत्महत्या प्रकरणाने संपूर्ण महाराष्ट्र हादरून गेला आहे. या प्रकरणी मंत्री शंभुराज देसाई यांनी अत्यंत गंभीर दखल घेतली आहे. 'कोणी अधिकारी असला तरी त्याला सोडणार नाही, आम्ही या प्रकरणाच्या खोलात जाऊन कठोर कारवाई करू,' असा स्पष्ट इशारा शंभुराज देसाई यांनी दिला आहे. पीडित डॉक्टरने तिच्या हातावर लिहिलेल्या सुसाईड नोटमध्ये एका पोलीस उपनिरीक्षकाने बलात्कार केल्याचा आरोप केला आहे, ज्यामुळे या प्रकरणाचे गांभीर्य अधिकच वाढले आहे.

देसाई यांनी साताऱ्याच्या पोलीस अधीक्षकांना स्वतः घटनास्थळी जाऊन तपास करण्याचे आणि सर्व पुरावे गोळा करण्याचे आदेश दिले आहेत. एका सुशिक्षित डॉक्टर महिलेसोबत पोलीस अधिकाऱ्याकडूनच असे कृत्य घडल्याने महिलांच्या सुरक्षेचा प्रश्न पुन्हा एकदा ऐरणीवर आला आहे. तसेच महिला डॉक्टरच्या नातेवाईकांना कोणावर संशय असेल तर त्यांनी सांगावे त्यांची देखील चौकशी केली जाईल आणि महिला पोलिस अधिकाऱ्यांना सांगण्यात आले की त्यांना विश्वासात घ्यावे. ज्या पोलिस अधिकाऱ्यांचे नावे यामध्ये आहे त्यांना शोधण्यासाठी 5 पथक रवाना करण्यात आली आहे अशी माहिती शंभुराज देसाई यांनी दिली आहे.