Death toll rises in Marathwada floods : मराठवाड्यात पावसाचा कहर सुरूच आहे. हवामान विभागाच्या अहवालानुसार गेल्या 24 तासांत नांदेड वगळता अन्य सातही जिल्ह्यांतील 129 मंडळांमध्ये अतिवृष्टीची नोंद झाली. बीड जिल्ह्यात सर्वाधिक म्हणजे 57 मंडलांत अतिवृष्टी झाली. अनेक ठिकाणी पूर आला आहे. बीड आणि धाराशिव जिल्ह्यांत पुरामध्ये अडकलेल्या 80 हून अधिक नागरिकांना वाचवण्यात यश आलं. नैसर्गिक आपत्तीमुळे आतापर्यंत 10 जणांचा मृत्यू झाला असून, 337 जनावरे दगावले. गेल्या 3 दिवसांत 2 लाख हेक्टरवरील पिके बाधित झाल्याचा प्राथमिक अंदाज आहे. यामुळे मराठवाड्यात ओल्या दुष्काळाची स्थिती आहे.

छत्रपती संभाजी नगर जिल्ह्याला आठवाभरापासून पावसाने झोडपले आहे. यावर्षी अनेक वर्षांचा विक्रम पावसाने मोडीत काढला आहे. सतत सुरू असलेल्या संततधारेमुळे कन्नड वैजापूर सिल्लोड सोयगाव गंगापूर खुलताबाद या तालुक्यातील अनेक शिवार पाण्यात आहेत. खुलताबाद तालुक्यातील वेरूळसह परिसरातील कसाबखेडा, मंबापुर, पळसवाडी, तलाववाडी, शादुलवाडी, शेकापुरी, तिसगाव, निरगुडी, पिंपरी, पळसगाव, आखातवाडा येथील पिके धोक्यात आले आहेत. मक्का, सोयाबीन, कापूस, आदी पिकांनी माना टाकल्या आहेत. पाने पिवळी पडत असून करपा, अळी रोगांचा प्रादुर्भाव पिकांवर वाढला आहे. यामुळे शेतकरी चिंतेत आला आहे. शासनाने तातडीने सरसकट पंचनामे करून नुकसान भरपाई द्यावी अशी मागणी शेतकरी वर्गातून करण्यात येत आहे.