मुंबई येथील आझाद मैदानावर मराठा आंदोलन मनोज जरांगे पाटील यांचं आंदोलन सुरू आहे. या आंदोलनासाठी राज्यभरातून मराठा बांधव लाखोच्या संख्येने मुंबईमध्ये दाखल झाले आहेत. मुंबई येथे सुरू असलेल्या मनोज जरांगे पाटील यांच्या आंदोलनाच्या विरोधात आता ओबीसी बांधव देखील आक्रमक झाले आहेत. नांदेडच्या हदगाव येथे ओबीसी बांधवांनी तहसील कार्यालयासमोर घोषणाबाजी करत निदर्शने केली. हदगाव तहसील मार्फत राज्य शासनाला ओबीसीच्या मागण्यासंदर्भात निवेदन देण्यात आलं. मराठा समाजाला विविध माध्यमातून आरक्षण देण्यात आलं आहे. परंतु झुंडशाहीच्या जोरावर ओबीसीमधूनच आरक्षण मिळवण्याचा मनोज जरांगे पाटील यांचा हट्टाहस सुरु आहे. मराठा समाजाला ओबीसीमधून आरक्षण देण्यात येऊ नये, मराठा समाजाला ओबीसीतून आरक्षण देण्याचा सरकारने निर्णय घेतल्यास महाराष्ट्रात उद्रेक होईल, असा इशारा ओबीसी बांधवांनी दिला आहे.