Nanded : मनोज जरांगे पाटील यांच्या आंदोलन विरोधात ओबीसी समाज आक्रमक; घोषणाबाजी करत निदर्शने

संजय सूर्यवंशी 

नांदेड : मराठा समाजाला आरक्षण मिळावे या मागणीसाठी मुंबई येथील आझाद मैदानावर मराठा आंदोलन मनोज जरांगे पाटील यांचे आंदोलन सुरू आहे. मात्र या आंदोलनाला ओबीसी समाजाकडून विरोध होत असल्याचे पाहण्यास मिळत आहे. कारण नांदेडच्या हदगाव तहसील कार्यालयासमोर ओबीसी समाजाने आंदोलन विरोधात निदर्शने करत घोषणाबाजी केली आहे. 

मराठा आरक्षण मिळावे यासाठी मराठा आंदोलक मनोज जरांगे पाटील यांचा लढा सुरु आहे. यासाठी अनेकदा आंदोलन केले आहेत. तर आता २९ ऑगस्टपासून मुंबईच्या आझाद मैदानावर बेमुदत आंदोलन सुरु केले आहे. या आंदोलनासाठी राज्यभरातून मराठा बांधव लाखोच्या संख्येने मुंबईमध्ये दाखल झाले आहेत. मुंबई येथे सुरू असलेल्या मनोज जरांगे पाटील यांच्या आंदोलनाच्या विरोधात आता ओबीसी बांधव देखील आक्रमक झाले आहेत.

ओबीसी समाजाचे तहसिलसमोर निदर्शने 

एकीकडे मराठा आरक्षणासाठी लढाई सुरु असताना या आंदोलनाला विरोध होत असल्याचे नांदेड जिल्ह्यात पाहण्यास मिळत आहे. नांदेडच्या हदगाव येथे ओबीसी बांधवांनी तहसील कार्यालयासमोर घोषणाबाजी करत निदर्शने केली. हदगाव तहसील मार्फत राज्य शासनाला ओबीसीच्या मागण्यासंदर्भात निवेदन देण्यात आलं. तसेच यावेळी घोषणाबाजी देखील करण्यात आली आहे. 

तर महाराष्ट्रात उद्रेक होईल 

मराठा समाजाला विविध माध्यमातून आरक्षण देण्यात आलं आहे. परंतु झुंडशाहीच्या जोरावर ओबीसी मधूनच आरक्षण मिळवण्याचा मनोज जरांगे पाटील यांचा हट्टाहस सुरु असल्याचे ओबीसी समाजाच्या पदाधिकाऱ्यांकडून सांगण्यात आले. मराठा समाजाला ओबीसी मधून आरक्षण देण्यात येऊ नये. मराठा समाजाला ओबीसीतून आरक्षण देण्याचा सरकारने निर्णय घेतल्यास महाराष्ट्रात उद्रेक होईल; असा इशारा ओबीसी बांधवांनी दिला आहे.