Manoj jarange Patil Latest News : मराठा आंदोलक मनोज जरांगे पाटील यांनी एक मोठी घोषणा केली आहे. येत्या 17 सप्टेंबरपासून अंतरवाली सराटी आमरण उपोषणाला बसणार, असं जरांगे यांनी सांगितलं आहे. जालना येथे माध्यमांसोबत संवाद साधताना त्यांनी ही घोषणा केली. यापूर्वी मनोज जरांगे यांनी आपण 29 सप्टेंबरला आमरण उपोषण करणार, असा इशारा दिला होता.

मराठवाडा मुक्ती संग्रामदिनाच्या दिवशी मराठा आरक्षणाच्या मागणीसाठी आमरण उपोषणाला बसणार, असं जरांगे यांनी माध्यमांसोबत बोलताना स्पष्ट केलं आहे. सगेसोयरे अधिसूचना काढून मराठा समाजाला सरसकट ओबीसी प्रवर्गातून आरक्षण द्या, अशी मागणी जरांगे यांनी लावून धरली आहे. गेल्या अनेक महिन्यांपासून यासाठी ते आंदोलन करीत आहेत.

राज्य सरकारने जर मराठा समाजाला आरक्षण दिले नाही. तर आगामी विधानसभा निवडणुकीत मराठ्यांची ताकद दाखवणार, असा इशारा जरांगे यांनी दिला आहे. देवेंद्र फडणवीस यांना मराठ्याचे आमदार हाताखाली धरून आंदोलन बंद करायचं आहे, असा आरोपही जरांगे यांनी केला आहे. जो कुणी मराठ्यांच्या विरोधात जाईल त्याला निवडणुकीत धडा शिकवू, असंही जरांगेंनी यांनी म्हटलं आहे.