बालाजी सुरवसे, धाराशिव, साम टीव्ही

जिल्हा परिषद आणि पंचायत समिती निवडणुकांचा धुरळा उडाला आहे. राज्यात अनेक ठिकाणी जागावाटप आणि उमेदवारीवरून राजकीय पक्षांच्या कार्यकर्त्यांमध्ये नाराजी उफाळून आली आहे. त्यात आता धाराशिवमध्येही शिंदेसेनेला मोठा धक्का बसला आहे. शिंदेसेनेचे दिग्गज नेते आणि माजी मंत्री तानाजी सावंत यांच्याविरोधात त्यांच्याच पुतण्यानं दंड थोपटले आहेत. जिल्हा परिषदेचे माजी उपाध्यक्ष धनंजय सावंत यांनी बंडाचा झेंडा फडकावला आहे. धनंजय सावंत यांनी परंडा तालुक्यातील जिल्हा परिषदेच्या पाच, तर पंचायत समितीच्या दहा जागांवर उमेदवार निवडणूक रिंगणात उतरवले आहेत. सावंत यांनीच उमेदवार उतरवल्याने शिंदेसेनेला खिंडार पडले आहे. हा तानाजी सावंत यांच्या साम्राज्याला मोठा धक्का असल्याचं मानलं जात आहे.