राजकीय वर्तुळातून मोठी बातमी समोर आली आहे. सतत धनंजय मुंडेंवर आरोप करत असलेल्या आमदार सुरेश धस यांनी मंत्री धनंजय मुंडे यांचीच भेट घेतली यामुळे राज्यातील राजकारण चांगलेच तापलेले दिसत आहे. मात्र यामागची इनसाइड स्टोरी सामच्या हाती लागली आहे. पंकजा मुंडे यांना नियंत्रणात ठेवण्यासाठी भाजपकडून धनंजय मुंडे यांचा बचाव केला जात असल्याची माहिती सुत्रांनी दिली आहे. बीडमधून धनंजय मुंडे यांचा पत्ता साफ झाला तर पंकजा मुंडे यांचा रस्ता मोकळा होऊ शकतो त्यामुळेच धनंजय मुंडेंना वाचवण्यासाठी भाजपच्या नेतृत्वाने वेगळे पत्ते फेकले असल्याची चर्चा सुरू आहे.

भाजप आमदार सुरेश धस आणि धनंजय मुंडे यांच्या भेटीची बातमी भाजप प्रदेशाध्यक्ष चंद्रकांत बावनकुळे यांनी दिली होती. त्यामुळे धनंजय मुंडे यांना पाठिंबा देण्यासाठी भाजपकडून पडद्या आडून तर हालचाली सुरू नाही आहेत ना याच्या चर्चा आता सुरू झाल्या आहेत. बीडचे सरपंच संतोष देशमुख हत्या प्रकरणामध्ये सतत आरोप करणारे सुरेश धस आणि धनंजय मुडे यांच्यात भाजप नेते चंद्रशेखर बावनकुळे यांनी मध्यस्थी केली आहे. राष्ट्रवादी काँग्रेसमध्ये धनंजय मुंडे यांना पदावरून हटवण्याची मागणी केली जात आहे. तर दुसरीकडे भाजपकडून धनंजय मुंडे यांचा बचाव करण्याची रणनीती आखली जात आहे.