राष्ट्रवादी काँग्रेस (शरद पवार गट) चे पुणे शहराध्यक्ष प्रशांत जगताप यांनी दोन्ही राष्ट्रवादी काँग्रेस एकत्र येण्याच्या चर्चेवर मोठी प्रतिक्रिया दिली आहे. पुण्यात दोन्ही राष्ट्रवादी गट एकत्र येणार असल्याच्या चर्चांना त्यांनी पूर्णविराम देत, आपली भूमिका स्पष्ट केली आहे. जर दोन्ही राष्ट्रवादी अधिकृतपणे एकत्र लढण्याचा निर्णय झाला, तर त्या दिवशी मी माझ्या अध्यक्षपदाचा आणि सदस्यपदाचा राजीनामा देईन असे जगताप यांनी निक्षून सांगितले आहे. त्यांनी पुढे स्पष्ट केले की, शरद पवार हे त्यांच्यासाठी काल, आज आणि उद्या सर्वकाही आहेत. परंतु तत्त्वांशी तडजोड करून ते पक्षात राहणार नाहीत. मी कुठल्याही प्रकारची चुकीची किंवा वाईट भूमिका न घेता, शांतपणे बाजूला होणे पसंत करेन असेही त्यांनी नमूद केले. ही निवृत्ती म्हणजे काही काळाकरता विश्रांती असेल, तो स्वल्पविराम असेल पण पूर्णविराम नक्कीच नसेल, अशा शब्दांत त्यांनी आपल्या भविष्यातील वाटचालीचे संकेत दिले आहेत. आगामी पुणे महानगरपालिका निवडणुकीच्या पार्श्वभूमीवर हे विधान अत्यंत महत्त्वाचे मानले जात आहे.