Nasrapur Case : नसरापूर बलात्कार प्रकरणात आरोपी दोषी, सोमवारी कोर्ट शिक्षा सुनावणार

संपूर्ण राज्याला हादरवून सोडणाऱ्या नसरापूर येथील तीन वर्षांच्या चिमुरडीवरील बलात्कार आणि हत्या प्रकरणात गुरुवारी पुणे जिल्हा व सत्र न्यायालयात अंतिम सुनावणी पार पडली. या सुनावणीत ६५ वर्षीय आरोपी भीमराव कांबळे याच्याविरोधातील आरोप सिद्ध झाल्याचे न्यायालयाने नमूद केले असून, या प्रकरणातील शिक्षेबाबतचा अंतिम निकाल २९ जून रोजी जाहीर करण्यात येणार आहे.

१ मे रोजी सुट्टीसाठी आजीच्या गावी आलेल्या तीन वर्षांच्या निष्पाप चिमुरडीवर अत्यंत क्रूरपणे लैंगिक अत्याचार करून तिची हत्या करण्यात आल्याची घटना घडली होती. या प्रकरणानंतर परिसरात संतापाची लाट उसळली होती. तपासादरम्यान पोलिसांनी भीमराव कांबळे याला अटक केली होती. अंतिम युक्तिवादादरम्यान सरकारी पक्षाने आरोपीविरोधातील परिस्थितीजन्य पुरावे, साक्षीदारांचे जबाब आणि इतर तपासातील निष्कर्षांच्या आधारे हा गुन्हा निर्विवादपणे सिद्ध झाल्याचा दावा केला.

आरोपीचा पूर्वीचा गुन्हेगारी इतिहास लक्षात घेता तो समाजासाठी धोकादायक असून त्याच्यात सुधारणा होण्याची कोणतीही शक्यता नसल्याचे सरकारी वकिलांनी न्यायालयात सांगितले. यापूर्वीच्या दोन गंभीर प्रकरणांत तो कायदेशीर प्रक्रियेमुळे सुटला होता, मात्र यावेळी त्याला कठोरातील कठोर शिक्षा म्हणजे फाशीच दिली जावी, अशी मागणी करण्यात आली.

दुसरीकडे सुनावणीदरम्यान न्यायाधीशांनी आरोपीच्या वर्तनावरही भाष्य केले. आरोपीला स्वतःची बाजू मांडण्यासाठी पुरेसा वेळ देण्यात आला होता. न्यायालयाने त्याला अनेक प्रश्न विचारले, मात्र त्याने कोणतीही स्पष्ट उत्तरे दिली नाहीत. आरोपीची मानसिक स्थिती आणि लैंगिक क्षमता यासंदर्भातील वैद्यकीय अहवाल न्यायालयासमोर सादर करण्यात आले असून त्यातून आरोपी मानसिकदृष्ट्या सक्षम असल्याचे तसेच लैंगिक कृत्य करण्यास सक्षम असल्याचे स्पष्ट झाल्याचे नमूद करण्यात आले. आता या अत्यंत संवेदनशील आणि चर्चेतील प्रकरणात न्यायालय २९ जून रोजी शिक्षेबाबत अंतिम निर्णय देणार आहे.