राज्याचे मुख्यमंत्री देवेंद्र फडणवीस दुष्काळी दौरा करत आहे. धाराशिवमध्ये मुख्यमंत्र्यांच्या दौऱ्यादरम्यान भाजप आमदार राणाजगजितसिंह पाटील यांनी शेतकऱ्यांना धक्काबुक्की केल्याचा गंभीर आरोप ठाकरेसेनेचे आमदार अंबादास दानवे यांनी केला आहे. अंबादास दानवे यांनी सोशल मीडियावर यासंदर्भातील एक व्हिडीओ पोस्ट करत सरकारला 'काजू-बदाम छाप सरकार' असा टोलाही लगावला. गेल्या काही दिवसांपासून भाजप आमदार राणाजगजितसिंह पाटील आणि ठाकरे गटाचे आमदार अंबादास दानवे यांच्यात राजकीय आरोप प्रत्यारोप सुरू आहेत.

ठाकरेसेनेचे नेते आंबदास दानवेंनी आणखी एक व्हिडीओ पोस्ट करत धाराशिवचे खासदार ओमराजे निंबाळकरांना देखील जोरदार टोला लगावला. दोन चार ट्रान्स्फॉर्मरच्या बदल्यात 3 लाख 29 हजारांचे मताधिक्य सत्ताधाऱ्यांच्या दावणीला बांधले की असाच तुसडेपणा नशिबाला येतो, असे म्हणत दानवेंनी व्हिडिओ ट्विट केला. ठाकरेंनी केलेले जिवापाड प्रेम पचले नाही तुम्हाला असा निशाणा देखील त्यांनी ओमराजेंवर साधला.