राज्यात आणखी एक शेकडो कोटी रुपयांचा घोटाळा उघडकीस आला आहे. भरधाव वेगामुळे होणाऱ्या अपघातांचं प्रमाण कमी करण्यासाठी वाहनांमध्ये स्पीड कंट्रोल मीटर बसविण्याची सक्ती करण्यात आली होती. मात्र, ही मीटर केवळ नावालाच इलेक्ट्रॉनिक असल्याचं धक्कादायक वास्तव समोर आलं आहे. ही स्पीड कंट्रोल मीटर गाड्यांचा वेग कमी करण्याऐवजी फक्त दाखवण्यासाठी बसविण्यात आल्याचा आरोप चालकांनी केला आहे. प्रत्यक्षात या उपकरणामुळे वेगावर कोणतंही नियंत्रण येत नाही.

याहूनही गंभीर बाब म्हणजे या बोगस मीटरसाठी चौपट शुल्क आकारलं जात असून चालकांना दिली जाणारी पावती देखील बनावट असल्याचं समोर आलं आहे. त्यामुळे गाड्यांसह प्रवाशांच्या सुरक्षेला मोठा धोका निर्माण झाला असून या संपूर्ण प्रकरणात मोठा आर्थिक गैरव्यवहार झाल्याचा संशय व्यक्त केला जात आहे. टॅक्सी चालक संघटनांनी या घोटाळ्याची सखोल चौकशी करून दोषींवर कठोर कारवाई करण्याची मागणी केली आहे.