रायगड जिल्ह्यातील महाडमधील प्रसिद्ध नाणेमाची धबधब्यावर काही पर्यटकांनी जीवाशी खेळ करणारे स्टंट करत परिसरात खळबळ उडवून दिली आहे. या धक्कादायक प्रकाराचे व्हिडीओ सध्या व्हायरल होत आहेत.या व्हिडीओमध्ये दोन डोंगरांदरम्यान दोरखंड बांधून गिर्यारोहकांनी धबधब्याच्या पाण्यावरून स्टंट करतानाचे दृश्य स्पष्टपणे दिसून येत आहे. ही संपूर्ण कृती अत्यंत धोकादायक असून, थोडासा चुकीचा अंदाज देखील जीवघेणा ठरू शकतो.

या प्रकारामुळे स्थानिक ग्रामस्थांमध्ये तीव्र संतापाचे वातावरण निर्माण झाले आहे. पर्यटनस्थळी सुरक्षेच्या दृष्टीने कुठलीही योग्य व्यवस्था नसताना अशा स्टंटसाठी परवानगी न घेता धाडस करणं म्हणजे निष्काळजीपणाचं उत्तम उदाहरण असल्याचं स्थानिकांचं म्हणणं आहे.या प्रकारावर कठोर कारवाई करण्यात यावी आणि भविष्यात अशा घटना पुन्हा घडू नयेत यासाठी प्रशासनाने पावले उचलावीत, अशी मागणी ग्रामस्थांकडून करण्यात आली आहे.