लातूर शहरातील चैतन्य ई-टेक्नो स्कूल या खाजगी इंग्रजी माध्यमाच्या शाळेचा धक्कादायक गैरकारभार उघडकीस आला आहे. योग्य परवानगीशिवाय शाळा सुरू असल्याचे स्पष्ट झाल्याने शिक्षण विभागाने शाळेवर टाळ ठोकून कारवाई केली. मात्र शिक्षण विभागाच्या आदेशाला केराची टोपली दाखवत शाळा प्रशासनाने टाळ तोडून पुन्हा शाळा सुरू केल्याचे समोर आले आहे. परवानगीशिवाय शिक्षणसंस्था चालवत असल्याचा गंभीर आरोप महाराष्ट्र नवनिर्माण सेनेच्या स्थानिक पदाधिकाऱ्यांनीही केला आहे.

शाळा व्यवस्थापन मनमानी पद्धतीने वागत असून विद्यार्थ्यांच्या भविष्यासोबत खेळ केला जात असल्याची टीका मनसेने केली. याप्रकरणी शाळा प्रशासनावर तात्काळ गुन्हा दाखल करावा, अशी जाहीर मागणी मनसेने केली आहे. शिक्षण विभागाने केलेली कारवाई धुडकावून शाळा बिनधास्तपणे सुरू ठेवली जात असल्याने पालकांमध्येही तीव्र नाराजी व्यक्त होत आहे. शिक्षण विभागाने पुढील कारवाई काय करणार, याकडे सर्वांचे लक्ष लागलेले आहे.