छत्रपती संभाजीनगर शहरातील संभाजी कॉलनीत दुसऱ्याच्या जागेवर कब्जा मारून दादागिरी करणाऱ्या एका राजकीय पक्षाशी संबंधित गुंडाने एका कुटुंबावर प्राणघातक हल्ला चढवला. यात प्रमोद रमेश पाडसवान यांचा रुग्णालयात नेईपर्यंत मृत्यू झाला, तर त्यांचे वडील रमेश पाडसवान आणि मुलगा रुद्राक्ष हे गंभीर जखमी झाले. शुक्रवारी दुपारी १ वाजता घडलेल्या खुनाचा थरार सीसी टीव्ही कॅमेऱ्यात कैद झाला. याप्रकरणी खून करणाऱ्या गुंडवर सिडको पोलीस ठाण्यात गुन्हा दाखल झाला आहे. सौरभ काशिनाथ निमोने, ज्ञानेश्वर काशिनाथ निमोने, गौरव काशिनाथ निमोने, वडील काशिनाथ निमोने, आई शशिकला आणि जावई मनोज दानवे अशी हल्लेखोरांची नावे आहेत. यातील सौरभ, काशीनाथ, मनोजला पोलिसांनी अटक केली आहे. संभाजी कॉलनीत वास्तव्यास असलेल्या पाडसवान कुटुंबाचे किराणा दुकान आहे. ज्ञानेश्वरने ३ वर्षापासून पाडसवान यांच्या घरासमोरील सिडकोच्या अतिरिक्त जागेवर गणपती बसवणे सुरू केले. २ वर्षापूर्वी पाडसवान कुटुंबाने दुकानासाठी हा प्लॉट विकत घेतला. या जमिनीवरुन निमोने सतत पाडसवान यांच्याशी वाद घालायचा.