मावळ तालुक्यात आज एक धक्कादायक घटना घडली. तळेगाव दाभाडे शहराजवळील प्रसिद्ध पर्यटनस्थळ कुंडमळा येथे इंद्रायणी नदीवर असलेला जूना पूल कोसळून दुर्घटना घडली आहे. रविवार असल्याने पर्यटकांची गर्दी होती, अशात पूल कोसळून अनेक पर्यटक इंद्रायणीत वाहून गेले होते त्यामध्ये 4 जणांचा मृत्यू झाला आहे. या घटनेवर स्थानिक आमदार सुनील शेळके यांनी माहिती दिली. ते म्हणाले, कुंडमळा या पर्यटन स्थळी जो जीर्ण झालेला पुल कोसळला तो फुल जवळपास तीस वर्ष जुना आहे. आणि त्या ठिकाणी पर्यटकांना जाण्यास बंदी होती, तो पुल फक्त स्थानिक गावकऱ्यांच्या वहिवाटी साठी सुरू होता. मात्र त्या ठिकाणी पर्यटकांनी नियम न पाळल्याने ही दुर्घटना घडली असा दावा मावळ विधानसभा क्षेत्राचे स्थानिक आमदार सुनील शेळके यांनी केला आहे.