कल्याणमध्ये बसमध्ये दीड लाख रुपयांचा मोबाईल चोरीला गेल्याने एक अजब प्रकार समोर आला आहे. बायकोला माहेरी सोडण्यासाठी बसने जात असताना तरुणाच्या खिशातील महागडा मोबाईल गायब झाला. मोबाईल गायब झाल्याचं लक्षात येताच तरुणाने बसमधील प्रत्येक प्रवाशांची झडती घेण्यास सुरुवात केली. त्याने प्रत्येक प्रवाशाची बॅग आणि खिसे तपासले यामुळे प्रवासी चांगलेच हैराण झाले होते. पण या घटनेमुळे वाहतूक कोंडीही निर्माण झाली होती. अखेर पोलीस घटनास्थळी दाखल झाले आणि तरुणाला तक्रार नोंदवण्यासाठी पोलीस स्थानकात जाण्याचा सल्ला दिला. या घटनेमुळे काही काळ परिसरात चांगलीच खळबळ उडाली होती.