संजय महाजन, साम टीव्ही

जळगाव जिल्ह्यातील रावेर तालुक्यात एक धक्कादायक घटना समोर आली आहे. मुलं पळवण्याच्या संशयावरून साधूंच्या वेशात आलेल्या दोघा व्यक्तींना ग्रामस्थांनी बेदम मारहाण केली. या घटनेमुळे परिसरात मोठा गोंधळ उडाला होता.

हरियाणातून आलेले हे साधू जडाबुटी विक्री करत असल्याचं सांगत होते. मात्र, मुंजलवाडी, कुसुंबा आणि लोहारा या गावातील नागरिकांनी त्यांच्यावर मुलं पळवण्याचा संशय घेतला. संतप्त ग्रामस्थांनी त्यांना रस्त्यावर पकडून मारहाण केली आणि त्यांच्या चारचाकी वाहनाचीही जोरदार तोडफोड केली.

घटनेची माहिती मिळताच सावदा पोलीस स्टेशनचे अधिकारी घटनास्थळी दाखल झाले. त्यांनी जमाव पांगवून परिस्थिती नियंत्रणात आणली. या प्रकरणी सावदा पोलीस ठाण्यात गुन्हा दाखल करण्याची प्रक्रिया सुरू असल्याची प्राथमिक माहिती आहे.

सध्या पोलीस या प्रकरणाचा तपास करत असून या दोघांनी खरोखरच गैरकृत्य केलं होतं की अफवेमुळे ही घटना घडली, याचा शोध घेतला जात आहे. पोलिसांनी नागरिकांना अफवांवर विश्वास न ठेवता शांतता राखण्याचं आवाहन केलं आहे