इराण-इस्रायल संघर्ष चिघळला असून आता तो युद्धाच्या उंबरठ्यावर पोहोचला आहे. इराणनं इस्रायलच्या राजधानीसह महत्त्वाच्या शहरांवर एकाच वेळी १०० पेक्षा अधिक बॅलेस्टिक क्षेपणास्त्रांचा मारा केला आहे. याआधी शुक्रवारी दुपारी इराणने १०० हून अधिक सुसज्ज ड्रोन्सनी हल्ला केला होता. इस्रायलनं इराणच्या अणुसंयंत्र केंद्रांवर कारवाई केल्यानंतर इराणने हा प्रतिहल्ला केला. काल रात्रीदेखील इराणकडून सतत क्षेपणास्त्र हल्ले करण्यात आले, ज्यामुळे इस्रायलच्या अनेक शहरांमध्ये मोठं नुकसान झालं असून अनेक नागरिक जखमी झाले आहेत. या युद्धजन्य परिस्थितीमुळे जागतिक स्तरावर अस्थिरता निर्माण झाली असून पेट्रोल-डिझेलच्या दरात मोठी वाढ होण्याची शक्यता वर्तवली जात आहे.

इराण-इस्रायलच्या अनेक अणुस्थळांवर हल्ला केला त्यामुळे जगभरातील बाजारपेठांमध्ये घबराट निर्माण झाली आहे. याचा भारतासह जगभरातील शेअर बाजारांवर नकारात्मक परिणाम झाला असून शेर्अस कोसळले आहेत. गुंतवणूकदार सुरक्षित गुंतवणुकीच्या शोधात त्यांचे पैसे काढून घेतं आहेत. त्याचा थेट परिणाम पुन्हा एकदा सोनं आणि डॉलरमध्ये जलद गुंतवणुकीच्या स्वरूपात होऊ शकतो. तर भारतात पेट्रोलच्या किंमतीत वाढ होऊ शकते अस झालं तर थेट परिणाम मालवाहतुकीवर होईल आणि जीवनावश्यक वस्तूंच्या किंमती कडाडतील.