इंद्रायणी नदीवरील पूल कोसळल्याची धक्कादायक घटना समोर आली आहे. पुलावरून जात असताना काही पर्यटक नदीच्या प्रवाहात वाहून गेल्याची माहिती आहे. घटनास्थळी बचावकार्य सुरू असून प्रशासन युद्धपातळीवर शोधमोहीम राबवत आहे. मावळ तालुक्यात एक धक्कादायक घटना घडली आहे. तळेगाव दाभाडे शहराजवळील प्रसिद्ध पर्यटनस्थळ कुंडमळा येथे इंद्रायणी नदीवर असलेला जुना पूल कोसळून मोठी दुर्घटना घडली आहे. यामुळे महाराष्ट्रात मोठी खळबळ उडाली आहे. रविवार असल्याने पर्यटकांची मोठी गर्दी होती. अशात पूल कोसळून अनेक पर्यटक इंद्रायणीत बुडाल्याची भीती वर्तवली जात होती. मिळालेल्या माहितीनुसार या घटनेत 20 ते 25 पर्यटक वाहून गेले आहे. घटनास्थळी 200 ते 250 एनडीआरएफचे जवान दाखल झाले असून काही जणांना वाचवण्यात यश आले आहे.