भारत आणि रशियामध्ये आज अनेक निर्णायक करारांवर शिक्कामोर्तब करण्यात आले. आरोग्य, शिक्षण, खतं, रसायनं, शिपिंग आणि ट्रान्सपोर्ट यांसह सागरी क्षेत्राशी संबंधित महत्त्वाचे करार दोन्ही देशांत पार पडले. या द्विपक्षीय चर्चेत भारत-रशिया संबंध अधिक दृढ केल्याबद्दल पंतप्रधान नरेंद्र मोदी यांनी रशियाचे राष्ट्राध्यक्ष व्लादिमिर पुतीन यांचे विशेष आभार मानले. जागतिक आव्हानांच्या काळातही भारत-रशिया मैत्री ध्रुवताऱ्यासारखी स्थिर राहिल्याचं मोदींनी यावेळी नमूद केलं. तसंच २०३० पर्यंतच्या आर्थिक सहकार्य रोडमॅपवरही दोन्ही देशांमध्ये सहमती झाल्याची माहिती पंतप्रधानांनी दिली. या भेटीमुळे आगामी काळात द्विपक्षीय व्यापार, गुंतवणूक आणि तांत्रिक सहकार्याला नवी दिशा मिळणार असल्याचं मानलं जात आहे.