मुंब्रा रेतीबंदर गणेश घाट परिसरात कचऱ्यात शेकडो मतदान कार्ड सापडल्याने मोठी खळबळ उडाली आहे. ही सर्व मतदान कार्ड कळवा विभागातील असल्याचे समोर आले असून यामुळे निवडणूक प्रक्रियेवर गंभीर प्रश्नचिन्ह उपस्थित झाले आहे.

या प्रकरणावर काँग्रेसचे मुंब्रा कळवा विधानसभा अध्यक्ष वसीम सय्यद यांनी गंभीर आरोप केले आहेत. त्यांच्या म्हणण्यानुसार, या मतदान कार्डांच्या मदतीने विधानसभा मतदारसंघ क्रमांक 72 मध्ये बोगस मतदान झाले आहे. गेल्या काही दिवसांपासून लोकसभेचे विरोधी पक्षनेते राहुल गांधी हे देशभरात झालेल्या लोकसभा आणि विधानसभा निवडणुकांमध्ये मोठे घोळ झाल्याचा आरोप करत आहेत. त्यामुळे आधीच निवडणूक आयोगाच्या कामकाजावर प्रश्नचिन्ह उपस्थित झाले असताना मुंब्र्यातील या घटनेमुळे आणखीनच खळबळ उडाली आहे.