मुंबईतील वरळीत भरधाव वेगात असलेल्या आलिशान कारने दिलेल्या धडकेत एका २८ वर्षीय व्यक्तीचा मृत्यू झाला आहे. अपघातानंतर सात दिवसांनी या व्यक्तीचा मृत्यू झाला असून विनोद लाड असे मृत तरुणाचे नाव आह. पोलिसांनी चालक किरण इंदुलकर यांच्याविरुद्ध गुन्हा दाखल करून त्याला अटक केली आहे. 20 जुलै रोजी वरळी सी लिंकजवळ अब्दुल गफ्फार खान रोडवर लाड यांना भरधाव BMW कारने धडक दिली होती. शनिवारी 27 जुलै रोजी उपचारादरम्यान त्यांचा मृत्यू झाला. वरळी येथे अशाच प्रकारची हिट-अँड-रनची घटना घडली होती यात 45 वर्षीय कावेरी नाखवा या महिलेचा मृत्यू झाला होता. तर आता वरळीतून आणखी एक अपघात झाला असून त्यात एका व्यक्तीचा मृत्यु झाल्याची बातमी समोर येत आहे. अपघातग्रस्त BMW कार पोलीसांकडून ताब्यात घेण्यात आली आहे. तसेच याच पोलीस ठाण्यात वरळीमधील हिट-अँड-रन प्रकरणात महिलेला धडक दिलेली BMW कार देखील इथे असल्याचं पाहायला मिळत आहे.